شنطة سفر وحيدة: عن رغبتنا إننا نكمل ونبدأ من جديد

by حسام علوان

نصوص وقصص وتأملات تتميز بالبساطة والعمق والشاعرية مكتوبة بالعامية المصرية بأسلوب سلس وممتع.

«دا كتاب عن رغبتنا إننا نكمل، وعن المشي كرحلة للداخل، عن الرغبة إننا نبدأ من جديد لما الدنيا تقفل في وشنا، وما يبقاش قدامنا غير طريق البدايات. بدأت الكتابة في فترة تخبط بتنتهي فيها علاقات قديمة استمرت سنين وما بتبتديش علاقات جديدة، في فترة رجعتني لسنواتي الأولى في القاهرة لما كنت وحيد بدون سكن ولا أصدقاء، وكل حاجة كنت بامسكها كانت بتتحول لتراب في إيدي، وكنت باعيش حالة من الفقدان والإحساس بالفشل لسه أثرها معايا لغاية النهارده.
كنت عاوز أحكي وألاقي حد يسمعني ... كنت عاوز أبص برايا عشان ألاقيني، وكنت محتاج أقرب من نفسي قبل ما أقرب من حد تاني.»

حسام علوان، مواليد 1972، تخرج من المعهد العالي للسينما، وحصل على ماجستير في دراسات السينما من جامعة سان فرانسيسكو بالولايات المتحدة، كما درس الإنتاج السينمائي في مؤسسة الرواد السمعبصريين الأوروبيين ومقرها لوكسمبورج. كتب القصة والنقد السينمائي في بدايات حياته، وحاز جائزة الدولة للإبداع سنة 1998. تنقل بين دول ومدن عدة خلال حياته بحكم عمله في مجال السينما، وعمل باحثًا في مجال الأفلام التسجيلية، كما ساهم في إنتاج عدد من الأفلام المصرية والعربية. ويُعد هذا الكتاب أول كتبه المنشورة.

208 pages, Paperback

First published January 26, 2018

About the author

حسام علوان، مواليد 1972، تخرج من المعهد العالي للسينما، وحصل على ماجستير في دراسات السينما من جامعة سان فرانسيسكو بالولايات المتحدة، كما درس الإنتاج السينمائي في مؤسسة الرواد السمعبصريين الأوروبيين ومقرها لوكسمبورج. كتب القصة والنقد السينمائي في بدايات حياته، وحاز جائزة الدولة للإبداع سنة 1998. تنقل بين دول ومدن عدة خلال حياته بحكم عمله في مجال السينما، وعمل باحثًا في مجال الأفلام التسجيلية، كما ساهم في إنتاج عدد من الأفلام المصرية والعربية. ويُعد هذا الكتاب أول كتبه المنشورة.

Reviews

[لبنى علاء · Rating 5 out of 5]

رحت مكتبة الشروق فرع طلعت حرب بالصدفة أسأل على الكتاب، ولفت نظري غلاف مجموعة "لا أحد يرثى لقطط المدينة" الي كنت قرأت عنها ريفيو اليوم الي قبلها، مسكت الكتابين في إيدي وإحترت أجيب أي واحد بعديت جبت لا أحد يرثى لقطط المدينة عشان جميل وغلاف الكتاب دا قبيح وأنا بتعصب من الأغلفة القبيحة، بس رحت بعدها بأيام واشتريته وفضلت أخفي الغلاف عن عيني لحد ما خلصته.

الكتاب جميل جدًا، من نوعية الكتب الي تضحي بسلامة رقبتك وعينك وما تسيبهاش من إيدك إلا وأنت مخلصها، كنت متصورة إني هنزعج من العامية لكن على العكس تمامًا اللغة كانت مناسبة وبتخدم المحتوى.

كان عندي إعتقاد مبدئي بنيته على أساس أكونت الفيسبوك بتاع الكاتب إنه مولود كدا وما عداش بمراحل شقاء وفقر زي ما واضح في أجزاء من الكتاب، وانه من قاطني القاهرة ومن عيلة متأصلة فيها كمان، لكن اتضح لي عكس كدا ودا كان مفاجئ ليا، مفاجئ وجميل.

بس السؤال، الحياة الي فيها سفر بكثافة دي بيتراح لها منين؟

[Heidi Hussien · Rating 4 out of 5]

كتاب يَحوي مجموعة من القصص الواقعية باللغة العامية يبدو ان جميعها من حياة الكاتب ..
بعضها عنه و بعضها الأخر عن أخرين ممن قابلهم ..
فقد استجمع في هذا الكتاب خبراته التي ستضيف إليك وتتعلم منها الكثير ..
ينهيها بشئ من التفاؤل ليعطيك طاقة إيجابية للحياة..
والجميل ان القصص ليست جميعها في مكان واحد، بل في بلدان مختلفه فستشعر و كأنك تسافر معه في كل مكان يحكي عنه ..
ستغوص في التفاصيل من دقتها و كأنك جزء من القصة ..
الكتاب سيلمسك و ستعيش معه مشاعر جميلة ..

أهم ثلاث كلمات يلخصوا هذا الكتاب (الإصرار، التحدي، النجاح)
أو كما وصفه الكاتب (كَمِّل)

#اقتباسات من الكتاب:

"خرجت من المطعم، و رحت أتفرج على بلكونة روميو و جوليت، مكان تجمع العشاق اللي بيروحوا المدينة، بعدين عديت أتفرج على محل بيبيع حاجات للسياح، وكانت البياعة بنت جميلة من بنات فيرونا، و سألتني إذا كنت عاشق بيدور على هدية لمعشوقته، فقلتلها إني مش عاشق، فقالتلي: ((طيب ما تخليك في فيرونا يمكن تلاقي عشقك هنا))."
"نهاية الحب –إذا إفتراضنا إن الحب بينتهي- هي حالة حداد مستمرة، يصاحبها فقدان اللغة (اللغة العاطفية)، و عدم القدرة على النطق بأهم مفرداتها و أجملها: ((أنا باحبك))."
"في الطريق للمطار ((كريج)) قالي: ((ما تجيب صندوق زي دا و تيجي نيويورك. هناك ممكن تاخد في تلميع الجزمة عشرة دولار، و نعيش ملوك في نيويورك)). و أنا رديت بتعالي و قلتله: (( انا حاسس إني عندي مهمة في الحياة أبعد من إني ألمع جزم)). ف((كريج)) سألني: ((زي إيه؟))، فقلتله: ((زي إني أساعد ناس زيك يلاقوا طريقهم في الحياة)). وش ((كريج)) انشكح، وقعد يشكرني زيادة عن اللزوم.”

[Ehab Haroon · Rating 2 out of 5]

عجبتني فقط الأجزاء المكتوبة بالفصحى . غير كده مذكرات و يوميات وحكاوي لا تمتع ولا تخص غير من يحكيها فيستعيد بها ذكرياته

[Farah Tarek · Rating 5 out of 5]

ربما الحياة ارحب و امتع مما كنت اعتقد

[zahraa esmaile · Rating 4 out of 5]

فيه كتاب كدة
تمسكه بالصدفة...تحس ان العنوان فيه حاجة بتشدك
ورغم انك راجع م المعرض بغنيمة كبيرة الا انك تاخده
وبتدأ فيه مباشرة
مع كل صفحة ف الكتاب بتحس ان الكاتب بيتكلم عنك...بيوصفك
خوفك وقلقك وفرحتك وحزنك
حالة عجيبة الكاتب دخلنى فيها على مدار 200 صفحة مقسمة
الكتاب مقسم مابين حكايات عن الكاتب فى مراحل مختلفة...ومابين قصص قصيرة فى اخر الكتاب
الكاتب قدر من خلال حكاياته عن نفسه يدخلنى فى حالة من الصداقة معاه
حسيت انى فى جلسة مع حد من صحابى محتاج يتكلم وانا محتاجة اسمعله
وبسمع وانا مبسوطة جدا وبعيش معاه كل كلمة بيقولها
حتى لو بالنسبة لى مش مهمة
والقصص القصيرة لطيفة ومكتوبة حلو
بالنسبة لى اول مرة أقرأ للكاتب
والحقيقة مش عارفة ليه كتب تانية او لا
بس الكتاب فى المجمل عجبنى
ولولا شوية الملل فى الاول كان اخد التقييم الكامل بجدارة
اربعة نجوم مستحقة
وكتاب استمتع بصحبته وبشدة
مما راق لى
*الصورة مفتاح لتسجيل الناس والحاجات الى بنخاف يختفو من حياتنا
*اذا كنت ترغب فى التعرف عاى الاضاءة الابدية،اخرج الماضى والمستقبل من عقلك،وابق فى الوقت الحاضر
انتهى الرفيو
#الكتاب_رقم_15_لسنة_2018
#خواطر
#كتاب_انصح_به

[Nelly Habib · Rating 4 out of 5]

الكتاب ده هو السهل الممتنع بالنسبالي .. اسلوبه سلس جدا و لكنه عميق .. حرك جوايا مشاعر كتير و خلاني ارجع لورا و افكر فقرارات كتير و مواقف كتير مريت بيها .. كا بقالي كتير مقرتش لأن ناقصني احساس الدفئ فالكتب اللي كنت بقراها بس الكتاب ده رجعلي الاحساس ده تاني .. شكرا جدا حسام علوان

[Alsanea · Rating 2 out of 5]

لفت انتباهي الغلاف والاسم بمعرض الكويت للكتاب الـ ٤٣ فأقتنيتها لعلي اقرأها في يوم ما ولم يطل انتظاري كثيراً فوقع اختياري عليها ان تكون اول قراءاتي لهذا العام ولم تكن بمستوى توقعي ابداً فخاب ظني ببداية جميلة لعامي هذا .
يوميات او بمعنى اصح ذكريات الكاتب التي ملأ بها ٢٠٧ صفحة مابين مسقط رأسه والقاهرة وايطاليا وامريكا وما مر به من احداث ومصاعب وصياعة بكل تأكيد .
.
.
2-1-2018

[Ahmed Salem · Rating 5 out of 5]

حسام علوان أسلوبة فى الكتابة جميل، سهل و عميق فى الوقت نفسه.
الحكايات اللى بيحكيها حسام حكايات فيها مستوى عالى من الانسانية و المشاعر، حسيت بمشاعر كتير فى قرائتى لحكايات حسام، و حسيت بنفسى متأثر جدا فى كتير من الحكايات و افتكرت معاها حكايات شخصية و مشاعر مريت بيها فى فترات سابقة.
ضحكت و عنيا دمعت و افتكرت البنت اللى "كنت" بحبها و حكايتنا انتهت لما كنت بقرأ حكاياته عن الحب.
كتاب جميل جدا و حلو بزيادة.

[Aisha]

كنت متابعة الكاتب من زمان على صفحته علي الفيسبوك ، كان دايما بينشر صور انتيكات وبوستاته كانت بتبقى مليان حكاوي وقصص باسلوب جميل جدا تماماً زي ماجه اسلوبه في الكتاب دا.

كنت بحسه من طبقة الأثرياء بما أنه بينشر صور كتير عن الانتيكات -مفتخرا باحتيازتها- وبيحكي تجاربه وحكاياته للبسطاء 😂😂....لكن الكتاب نسف كل توقعاتي ، الكاتب مر  بمحطات كتير في حياته  منها القاسي ومنها الصعب وفي الحالتين كان محافظ على روقانه ❤️❤️😂

سمعت الكتاب من خلال تطبيق ستوريتل و اسلوب القارئه حسسني أن الكلمات دبت فيها الحياة بصوتها 🌸

[Mona_97_ · Rating 1 out of 5]

كاتب مُثقف

[Mohamed Yehia · Rating 2 out of 5]

حكايات ..بعضها لطيف والبعض مبالغ فيه والبعض لا يستحق الكتابة في كتاب ،مجرد بوست على الفيس بوك يكتب، الكتاب كان يحتاج لمحرر لاستبعاد ما ليس له لزوم،و حذف المعلومات المكررة

[أحمد السكري · Rating 4 out of 5]

"كتاب عن رغبتنا إننا نكمل، وعن المشي كرحلة للداخل، عن الرغبة إننا نبدأ من جديد لما الدنيا تقفل في وشنا، وما يبقاش قدامنا غير طريق البدايات"

كتاب ممتع , مسلي , الكاتب عنده خبرات كتيرة متراكمة و تحس أنها كانت كامنة في صدره و حب يبوح بيها و يدردش مع غريب في محطة القطر بدون حرج و لا كسوف حتى من أخطاء أرتكبها فكتب الكتاب البديع دا اللي بينتمي للكتب خفيفة التلقي عميقة الأثر .

الكتاب أخدني من الشرق للغرب، من الأكل الشعبي لأكل المطاعم الراقية ومن القهاوي ف مصر لجناين أوروبا، ومن السواقين في مصر لمشردين أمريكا، ومن شقق أوروبا لشقة في سوق فكيهة.

في ثراء كبير في علاقات الكاتب العاطفية و الإنسانية بشكل مش طبيعي , تحسه شخص محب للبشرية , مواطن عالمي الجنسية لا تحده أرض و لا تسقفه سماء مثال على ذلك لما قابل شخص مسلح و كان ناوي يقتل أول حد يقابله في طريقه , شوف أدار الحوار معاه أزاي و أنتهي الموقف بإيه, كمان شخص مثقف جدا و هتلاحظ دا في التفاصيل اللي ب��كرها في الكتاب من أماكن و شخصيات عالمية و أحداث تاريخية بكل أريحية و بدون حزق و محاولة التلويح بأنه علامة حتى و أن نفى دا في أحدى القصص , شخص طيب جدا و أعتقد و بكل ثقة أقدر أقول أن دي مش تجارب فاشلة زي ما أشار إليها في عدة مواضع لأ دي تجارب و خبرات حياتيه و إنسانية أفادته جدا و متعتنا و هو بيسردها بالشكل العجيب و الطريقة المميزة الساحرة الآثرة دي .

" الفراغ هو كل مكان لا تحضرين فيه "

صعب تصنف الكتاب دا كأدب رحلات هناك رحلات وأسفار بالطبع، ولكن مفهوم الرحلة هنا أشمل من معنى السفر، إنها رحلة حياة بكل تفاصيلها المدهشة، مكتوبة فى لوحات مادتها الكلمات، وبأسلوب يقطر سخرية فى أحيان كثيرة، والخيط الرابط هو إصرار مؤلف الكتاب على أن يتعلم، ويعرف، ويكتشف، ويتحقق، ويكتب عن البشر والأماكن ’ بل يتوج دا بالحكم اللي هو شخصيا أستفاد منها و ماشي بيها في حياته زي نصائح شمس التبريزي العشرة اللي ذكرها في ص152 .

يحكي "حسام علوان" عن أصدقائه الذين كانوا يودعونه بينما يسافر إلى أمريكا، يقول: كانت عندي حالة من الفرح لأني خدت الفيزا في آخر لحظة وهقدر أسافر، وبدأوا يضحكوا عليّ عشان فرحان بالسف، صديقي الأولاني اللي معاه الجنسية الأمريكية قال لي: أنت فرحان إنك مسافر أمريكا؟ فقلت له آه، صديقي اللي عايش في إيطالي قال لي: أنا خلاص بالنسبة لي موضوع السفر بقى تحصيل حاصل، قلت لهم عارفين النكتة الفرنساوية بتاعت التلاتة اللي قاعدين في البار، اتنين منهم بيتكلموا مع بعض بقرف، الأول بيقول: أنا أمارس الجنس مرة كل شهر، فالتالت اللي مش قاعد معاهم ضحك، فالتاني قال: أنا بمارس الجنس مرة كل أسبوع، فالتالت ضحك أكثر، فقالوا له: أنت بتمارس الجنس مرة كل يوم؟ فقال لهم: لا مرة في السنة، فقالوا له: بتضحك ليه؟ فقال: عشان ليلتي النهاردة؟ ثم يضيف المؤلف لصديقيه: أنا بقى التالت.

بعد كل التجارب العاطفية دي كلها متشوق جدا أعرف مين الشخص اللي أختاره الكاتب يكون شريك حياته و أزاي حصل صدفة لقاؤهم و تعارفهم .


و أقتبس من مقال الكاتب وجدي الكومي عن الكتاب اللي هحط اللينك بتاعه آخر الريفيو الجزء دا :

الفصل الذي منح الكتاب عنوانه، "شنطة سفر وحيدة" يحكي فيه حسام علوان عن إصلاحه لحقيبة سفره غالية الثمن موديل "أسبري" وكيف واجه حيرة شراء حقيبة جديدة، أم إصلاحها نظرا لتلف سوستها، وتمزقها في أكثر من موضع، يأنسن حسام علوان في هذا الفصل حقيبته، ويمنحها شخصية اعتبارية، يسترجع معها ذكرياته في السفر، والمرات التي صحبته فيها، وهو ما يجعل للحكاية مغزى غير مغزاها الظاهري، فليست الفكرة هنا في قص حكاية عن حقيبة سفر، بل تتعداها إلى دلالات حقيبة السفر، بما تحمله من معان مبطنة مثل "شريك السفر/شريك الحياة، الشريك الذي يقبل استكمال المشوار والحياة معنا، وتحمل كل مصاعبها، يقول حسام في موضع من مواضع هذا الجزء من الكتاب: قررت أكتب لشنطتي رسالة تعبر عن شعوري تجاهها: شنطتي العزيزة..لما بقف عند سير الشنط استناكي، بابقي عارف إنك شبه شنط كتير سودة، ورغم إنك معلكيش علامة تميزك، لكن بابقى عارف إنك غيرهم، وإني لما هشوفك هعرفك، إنتي رقيقة لكن متماسكة، ويا ما جريتك ورايا، وأنا ماشي مسافات طويلة عشان معييش فلوس، أخدك وأركب بيها تاكس، بس بابقى عارف إنك هتستحمليني زي ما استحمليتني سنين طويلة.

وانتظرت المزيد بعد انتهاء النص . ليت مؤلف الكتاب يُفرج عن خبرات إنسانية أخرى لينشرها فى كتب قادمة.



سلام و محبة لك يا أستاذ حسام <3

مقالات و ريفيوهات عن الكتاب :-
مقال الكاتبة شيرين سامي : https://bit.ly/2K3Ygm1
مقال الكاتب وجدي الكومي : https://bit.ly/2K31tCk
مقال الكاتب هشام أصلان : https://bit.ly/2Fz2vaP

[Ali Moustafa · Rating 5 out of 5]

اول مرة اقراء حاجة بالعظمة دي ،،
كنت بسيب الكتاب وبرجعله بعد فترة وانا لسه متعلق بيه !! زي مايكون كنت عايش كل لحظة بيقول عليها .
خروجي من قصة لغيرها دخلنى في حالة من عدم الاكتفاء وعايز تانى عايز اعرف حصل ايه تانى !!

بالنسبالى دا يعتبر افضل حاجة قراتها فـ 2019 وهاتفضل سايبه آثارها معايا.

[مصطفى التلواني · Rating 3 out of 5]

كتاب خفيف مكتوب بعين مختلفة.

[Emanelnagar · Rating 4 out of 5]

الكتاب حلو جداً علي الرغم من العشوائية اللي موجوده فيه!

[Sara Abdelhadi · Rating 4 out of 5]

كنت عارفة بعض الحكايات من الفيسبوك وده اللي شجعني أشتريه الحقيقة، الكتاب خفيف وجميل جدًا :)
ومن زمان مقرأتش شيء بالعامية يمكن التغاضي عن عاميته لأثره الطيب ومحتواه اللطيف.

[Tamer · Rating 5 out of 5]

خسارة ان الكاتب الحساس ده مش بيكتب كتير

[Lamiaa Essam · Rating 4 out of 5]

لطيف وخفيف

[محمد المغازي]

حكاوي قهاوي لذيذة وخبرات وطرايف ف 200 صفحة لمحبي السفر والترحال
وأحلى حكايات كانت ع الطليان ، يالهوي عليهم وع جمالهم وتنوعهم

[Islam Atef · Rating 5 out of 5]

مراجعة كتاب شنطة سفر وحيدة لحسام علوان.

بلغة سردية رشيقة وممتعة، كتب لنا الكاتب المبدع حسام علوان مقتطفات من حياته في ريعانها في تسعينيات القرن العشرين ومطلع القرن الواحد والعشرين بين بسطاء ومهمشين القاهرة قبل أن تنتقل به الحياة إلى فناني إيطاليا ومثقفي أوروبا وأكاديميون أمريكا.

أهم ما ميز علوان طوال رحلته هو قدرته المدهشة على تقبل مع الأخر بل والتأقلم معه وربما الاندماج معه، أظن أن قدرته على تذوق الفنون بمختلف أنواعها هي التي منحته تلك الطاقة الكبيرة لحب الناس والحياة بمختلف انتماءاتهم وثقافاتهم، فكان هذا الحب النقي للحياة والناس مفتاحه لدخول كل القلوب والنفوس التي قابلها. قبل أن ينتقل بنا فجأة إلى نشأته الأولى لكي يضئ لنا مشاهد من نشأته وتكوينه في أرياف دلتا مصر، والتي يبدو عليه أنه أحسن استغلال نقاء الطبيعة والقلوب المحيطة به حينها، فنمى بداخله سلام نفسي كبير، قبل أن ينقله بدوره لكل من حوله.
شكرا للكاتب المبدع حسام علوان على الوقت الممتع الذي قضيته بين ضفتين كتابك.
يذكر أن حسام علوان مصور محترف، وهاوي جمع سجاد وتحف نادرة، بالإضافة إلى عمله كمنتج سينمائي.

[Ayat Salah · Rating 5 out of 5]

من اجمل ما قرأت، حسام علوان يكتب ببساطة وواقعية بروح الرحالة عن ايام في حياته من الغربة الداخلية والخارجية .. داخل الأماكن وداخل النفس .. هنا وهناك ، فما أن تبدأ في القراءة حتي يستقطبك لإنهاء القصة تلو القصة .. حواديت صغيرة بالعامية تصلح للمتعة وتخيل الاماكن والأشخاص ، قصص كفاح و شقا تشبه شباب مغامر تعرفهم أو تسمع عنهم ، ما ان يحمل حقيبته للسفر أو يجهز أوراقه أو يبحث عن سكن في بلاد بره أو جوه إلا أن تتخيل نفسك معه في صورة كاملة تخرج من بين السطور تحمل معه الحقيبة أو تنظر معه الي الفتاة المعجب بيها أو تنظر معه الى جدران المتاحف أو تستمع إلى سائقي التاكسي و تفاصيل التفاصيل، في كل قصة يضفي عليك مشاعر سعادة وحزن في نفس الحدوتة في نفس اللحظة التي لا يفصل بينها سوى سطر أو سطرين، ولكن الأغرب اني حزنت لإنتهائي من الكتاب و تمنيت ان يكون مضروب حجمه في اتنين أو تلاتة من القصص اللانهائية..

[Hamda hj96a · Rating 3 out of 5]

3.89 🌟

كتاب جميل وسلس في لغته، غير أنّ محتواه لم يتّسق تمامًا مع عنوانه الفرعي “رغبتنا في أن نكمل من جديد”.
كنتُ أظنّ أنّه سيغوص أكثر في الجوانب النفسيّة والتحليلية، لكنه بدا أقرب إلى مجموعة قصص قصيرة من حياة شابّ بسيط، يتنقّل بين مصر وأمريكا، حاملاً تفاصيل يوميّة تحمل في طيّاتها الكثير من الحنين والاغتراب.

الكتاب مناسب لقراءة هادئة على فنجان قهوة، خفيف الظلّ، ويمكن لأيّ قارئ أن يُنهيه في يومين أو أقل.
مصطلحاته سهلة ومتناسقة، ولغته منسابة بانسجام جميل مع كلّ قصة.

كثيرة هي الاقتباسات التي لامستني، لكن أكثرها وقعًا في نفسي كان هذا:
“كان لابدّ أن أغادرك، ألا أراكِ مرةً أخرى، وإلى الأبد.”

[Rania · Rating 3 out of 5]

يقول في احدى الصفحات ان من افضل كتبه كتاب في الطريق ل��يرواك وواضح تأثره فعلا بيه مش بس ككاتب لكن في اُسلوب حياته. الكاتب بياخد نمط الهائم على وجهه وعائش بسلاسة. الكتاب نفسه تقسيمه وأسلوبه ليعكس شخصية الكاتب. لايجود تسلسل من اي نوع في الكتاب كأنه مجموعة من خواطر وذكريات يستحضرها الكاتب على ورق وأراد أن ينقلها للقارئ كما هي. ربما تكون تلقائيته هي سر نجاح او فشل هذا الكتاب حسب وجهة نظر القارئ.
٣.٥

[Shehab El-Hariry · Rating 4 out of 5]

خبرة الحياة و التعامل مع الناس بتخلي الإنسان عنده فلسفة في الحياة بتأثر علي كل حاجة بيعملها خصوصا أسلوب الكتابة.
الكتاب فعلا حلو. الناس في الاول و الآخر بسيطة جدا و احتياجاتها مشتركة. احنا بس اللي معقادينها.
من امريكا للمقطم لباريس حكايات لا تنتهي عن الحب و الحياة. شكرا علي مشاركتك لقصصك الممتعة.

[Tota · Rating 1 out of 5]

للأسف مشدنيش و لم أكمله بالرغم اني كنت متابعه الكاتب على الفيس و كان صور الأنتيكات و الحكاوي الي بيكتبها جميله !!
قريت أول كام صفحه و لكن حكاوي السفريات و البنات الي قابلهم لم تجذبني و لم استفيد منها شيء فقررت اني مش هكمله

[May · Rating 2 out of 5]

المؤلف بيكتب عن مواقف قابلته فى حياته حاول يشاركنا التجارب دى و يبين لنا فيها الحكمة من بعضها لكن للاسف أسلوب السرد مكانش جذاب كفاية مش زى عمر طاهر مثلا .

[ِAbdulrahman Mahmoud · Rating 3 out of 5]

كتاب مسلي و قصص ظريفة مناسبة انك تقراها و انت مسافر

[باسم السلاموني · Rating 3 out of 5]

كاتب كثير الترحال وضع كتاب شيِّق. ذكر الكاتب أيضاً الكثير من الأعمال الأدبية والفنية مما أعطى الكتاب رونقاً أرستقراطياً رفيع.

[pəˈteɪtəʊ · Rating 4 out of 5]

من غي المُجدي محاولة معرفة أين يقود الطريق. فكِّر فقط في الخطوة الأولى، والباقي سيأتي.

[Ahmed seif]

تجربة سيئة جدًا، وكتاب لا يستحق ثمن الحبر والورق الذي استخدم في طباعة هذا الكلام المُهتَر، على امتداد صفحات الكتاب.. كنت أسال نفسي ما هدف الكاتب من هذه الحكايات وما الذي استفدته منها وأين المتعة في هذه الحكايات التي لا يجمعها أي رابط؟

ربما الشيء الوحيد الذي استفدته من هذا الكتاب السيء؛ هو أن الكاتب أقنعني بعبثية الكتابة باللغة العامية، كنت إلى حد ما معتدل في الأمر، لكن حين خضت تجربة القراءة بالعامية لعنت أصحاب هذه الدعوة.

في المجمل، الكتاب فوضوي بشكل كبير، مكتوب بلغة عامية مصرية والحكايات مفككة، لا يستحق الوقت أو المال.